Larimar`s Minnemalerey
  Auswahl Texte
 

Eine Auswahl an Textenfindet Ihr hier

www.deutsche-liebeslyrik.de/minnesang/minnesang.htm


21. Konrad von Altstetten

1. Der sumer hât den meien (SMS XXIV,3)

1 Der sumer hât den meien
froelich vür gesant,
der sol fröide heien
und daz er si erkant,
5 wan er vertriben was.
ir kint, ir sint niht laz,
ir brüevent in, er bringt iuch bluomen unde gras.
zwô brûne brâ
die hânt mich dâ
10 verwundet sêre und anderswâ.

2 Swel frowe trûric waere,
diu sol wesen frô;
ich sage ir guotiu maere:
ez meiet hiure alsô
5 daz aller frowen heil
ûf gât ein michel teil.
ir kint, ir sunt fit fröiden jârlanc wesen geil.
ein kele wîz
hât wol den prîs:
10 sî machet mich an jugende grîs.

3 Nu wünschent al gemeine
daz mîn leit zergê:
die ich mit triuwen meine
(diu tuot mir dicke wê),
5 daz ich ir werde erkant.
ir kus der waere ein pfant,
den ich vür tûsent marke naeme sâ zehant.
ein umbevanc
mit armen blanc,
10 des wünscht dem der den reigen sanc.

 

2. Wol dem meien, wol der wunne (SMS XXIV,2)

1 Wol dem meien, wol der wunne,
wol der sumerlîchen zît!
tanzen reien, swer daz kunne,
der kêr ûf den anger wît.
5 dâ sun wir den meien grüezen,
singen der vil reinen süezen,
diu kan machen herzen lachen:
singent alle wider strît!

2 Wol ir henden, wol ir wange,
wol ir hiufeln rôsenrôt!
torste ich senden mit gesange
mîniu liet der ich ie bôt
5 mînen dienst mit ganzen triuwen!
den wil ich ir jaerlîch niuwen,
daz diu reine, diech dâ meine,
scheide mich von sender nôt.

3 Wol ir ougen, wol ir munde,
diu gent liehter varwe schîn!
swer nu tougen blicken kunde,
dem wold ich die frouwen mîn
5 zeigen, daz er sî gesaehe
und er bî dem eide jaehe,
daz sî zwâre in eime jâre
sô niht möht gebildet sîn.

4 Wol ir brâwen, wol ir kinne,
wol ir kel sô lilienvar!
ich muoz grâwen, ald ir minne
tüege mich an sorgen bar.
5 seht, dem tuot sî ungelîche,
diu vil reine saelderîche.
wê mir armen! âne erbarmen
diene ich ir mit triuwen gar.

5 Wol ir lîbe, der sô schône
nâch dem wunsche sî bereit!
got nie wîbe gap die krône,
die sî an ir lîbe treit.
5 sumerkleit hât er ir gesnitten:
saelde und zuht nâch wîbes sitten
hât diu reine, diech dâ meine,
daz sî gar mit zühten kleit.

 

 
  Insgesamt waren schon 20969 Besucher (49217 Hits) hier!  
 
Diese Webseite wurde kostenlos mit Homepage-Baukasten.de erstellt. Willst du auch eine eigene Webseite?
Gratis anmelden